или
ИДЕОЛОГИЈАТА И УМЕТНОСТА (9)
1.
Неспорно е дека паралелно со религиозните и националните брани во човековиот ум, подеднакво ефикасни во пореметувањето на рационалното размислување се и идеополитичките убедувања и предрасуди. Иако овие последниве можеби ја немаат еднаквата погонска сила на мотивацијата како првите две, сепак идеолошките / политичките „вознеси“ (се покажало / се покажува на дело!) умеат да бидат жесток противник на умот.(Се разбира, особено ефикасни можат да бидат нивните комбинации: национално со идеолошко, религиозно со идеолошко итн!). Но, има една битна разлика: речиси по правило – а и тоа се покажало / се покажува на дело – за агилноста на идеолошките и политичките акциски двигатели битно е, ако не и суштествено, перманентното материјално финансиско потхранување на „организмот“, на неговиот секојдневен практикум. Иако тие аспекти се вообичаено добро прикриени низ разноразните супстрати на идеолошкото дејствување, ама – тука се, неизбежни се, дури неопходни се. Нема идеологија, нема политичко дејствување без материјално финансиски компензации! А и тоа ние, денес, одлично го научивме.
Таквите компензации понатаму диригираат повисок или понизок степен на инволвираност и гласност – да не речам слепило, зашто тука нема слепило, се’ е кристално јасно и чисто – во застапувањето на прокламираните „тези“, на поврзувањето на / со налудничавите замислени реперни точки на базичната матрица и дневната политика. Или, поинаку кажано, колкава доза на компензации беа потребни за развивањето на шарлатанската антиквизациска теорија, какви стимулативни средства беа барани за дневно оддржување на лекоумната (македоно)античка теза, колкава е фактурата за минхаузенштина наречена скопски барок … итн? Или најновото „откритие“ на хаџиглупакон дека Модерната всушност започнала токму во – Македонија!? Што, или колку, имено, треба да му се даде на некоја будала за да два пачворк килими ги прогласи за нова Македонска Модерна којашто, „сосема случајно“, е дури и пред историската Европска Модерна? Мислам, навистина, кооолкав шутрак треба човек да биде за да измисли такво нешто? И јавно да го каже?!
2.
Завршетокот на овие (во продолжетоци) согледувања за врските на идеологијата и уметноста, со акцент на актулените македонски состојби, не би бил целосен без краток осврт на можните форми на „отпор“ против идеологизираните зандани на мислата, против диктатот во уметноста и јавниот настап.
Во случајов можеме да тргнеме и од крајот, од веќе посочениот неодамнешен пример за спектакуларното „откритие“ (а зарем не беа сите такви кај нас?) на новата „Македонска Модерна“ токму во Музејот на Македонија. (Е ова малку ме буни, зошто тоа не беше направено во Музејон на хоророт, или во новион Археолошки музеј? Можеа килимите и таму да бидат сместени, како археолошки експонат!). Но, шега на страна, презентираните ќилими си се во ред и очигледно се производ на отворен занаетчиско – творечки ум. И апсолутно напредни за времето во коешто биле направени. Ама тоа да се прогласи за Модерна е навистина малоумно. Но, како на ваквата налудничава провокација (ќе) реагира македонската јавност – стручна, експертска, професорска …? Нормално, никако. Можеби „педагогон“ и „автор на филмови“ (ќе) има нешто да каже, зашто таквата провокација ги поништува сите негови „книги“ на таа тема? Не, се разбира, после „авторската“ вечер тој самозадоволно дреме на деветото небо. Ниту пак некој друг, или пак некоја институција, ќе се почувствува барем професионално засегнат(а) да го смести овој „стручњак“ на вистинското место. Впрочем, тоа не се случи ни пред неколку години, кога токму истиот Хаџи Пуља го катаклизмираше центарот на градот со неговото налудничаво поимање на уметноста низ формата на оние т.н. скулптури.
Оттука, отсуството на каква и да е’ (стручна, професионална) реакција на предизвиците на идеологизирањето на (творечката) стварност е некаква македонска константа. Иако не секогаш, и не целосно. Но, да одиме со ред.
3.
Имено, ниту една идеологија, ниту една идеолошко политичка пропаганда нема целосен опфат, нема комплетна (акламативна или консензуална) поддршка во дадената средина. Тоа не го постигна ни рускиот / кубанскиот / кинескиот комунизам, не го достигна ниту германскиот нацизам. Уште помалку тоа е остварливо денес, во втората деценија на 21от век. Идеологијата веќе нема таква (а)кумулативна моќ. Ја нема дури ни нацијата / националноста. Единствен таков заслепувачки моќен двигател, според Хантингтон, можеби (се’ уште) е религијата, којашто успева да иницира и насочи огромна деструктивна енергија, кога и ако е потребно. Но ни тука (веќе) нема стопостотен цензус, ни во религијата не се сите верници подготвени на се’.
Па оттука, идеолошките дискурси, особено денес, мораат да сметаат на различни форми на (посилен или послаб, отворен или скриен) отпор манифестиран повторно главно низ неколку видливи етапи. Или, поинаку кажано, потенцијалното формирање на антиидеолошки блок поминува низ барем три фази. Се разбира, овде поентата е на Уметноста, на уметничката борба против идеологизираната свест и стварност, наспротив сите други можни форми на отпор (политички, граѓански, институционален, активен / пасивен итн.). Иако, нормално, во одделни точки сите тие се допираат на еден или на друг начин, се вкрстуваат и можеби се надополнуваат.
Зашто, колку и да сака, идеологијата / идеолошката пропаганда, па и нејзината најдобра слугинка политиката, денес веќе ја нема ударната сила на убедување дека животот е само хемиска перцепција на мозокот, дека поединецот е тука за да го следи упатството за употреба на животот дадено од власта, дека треба само да прави деца и да верува во митови и легенди набиени со националистички дух. Дека неговото мислење не е меродавно (освен во одделни „отворени денови“), дека сепак нема поединец туку логиката на стадото е современа терапија за душата … Таквите идеолошки матрици развиваат просопагнотичен тип на човек, оној кој веќе не си го препознава ни сопствениот лик во огледалото, туку постојано го гледа ликот на Водачот!
Оттука, самосвеста е битна, можеби клучна алка во секое придвижување на силите на отпор, на неприфаќање на таквата улога на поединецот и идеолошкиот диктат во сите сфери на животот. Па и во уметноста. Ако треба во втората деценија на 21от век да расправаме дали поединецот (уметникот) има право самостојно да мисли, да создава (дури и по цена да греши), да говори и полемизира за актуелните случувања во општеството, тогаш не говориме за современо туку за регресивно и репресивно општество. Наспроти сите отворени но и задскриени, брутални но и софистрицирани начини на репресија и наметнување на идеолошкиот дискурс, во општеството секогаш постојат поголеми или помали (но докажливо растечки) сили на несогласување и отворен отпор.
4.
Првата можна фаза на соочување со новонаметнатиот идеолошки дискурс секако е – шокот. Шок при соочување со реалноста, шок од подготвеноста на другиот да се осмели да диктира „домашни задачи“ во уметноста, шок од летаргичното прифаќање / молчење на мнозинството. Таква, веројатно, шок фаза преживувале и македонските уметници во времето на првите денови / години на соцреализмот, читајќи ги критиките по повод годишните изложби на ДЛУМ. На пример, прашањето од типот „… знае ли уметникот што твори и што сака, или творештвото на уметникот е несвесно или полусвесно“, или констатациите дека „… импресионизмот е капиталистичка уметност, т.е. декадентна, назадна, реакционерна“, или пак дека „кога Пикасо црта женско лице кое како да го гледате и во профил и во ан фас истовремено, тогаш тоа не може да биде друго освен обезличување на реалноста“! Сериозен уметник / интелектуалец не може(л) да не биде шокиран, да остане(л) целосно рамнодушен кон ваквите квалификации.
Или, може ли да се замисли шокот на Дикс, Нолде, Кирхнер, Шагал, Енсор, Архипенко, Марк, Матис … и стотици други уметници кога Адолф Зиглер ги сместува на листата на „Дегенеративна уметност“?
Оттука, несомнено е дека за мнозинството така делуваше и кратката пропагандна полуаматерска видео анимација на т.н. проект „Скопје 2014“, којашто претставуваше во суштина смешна и очајно лоша презентација на некакви (идеологизирани) визури на некое идно Скопје. Иако многумина гледаа на тоа како на можност за (демократска) јавна расправа, се покажа дека многу се излажале. Но наспроти сите (очекувани) изрази на неверување дека Македонија може да тргне по таков пат, таа вулгарна верзија на идното Скопје се претвори во отворена порака, во идеолошко политички „манифест“ за тоа што ќе ни се случува: за новата „архитектура“, новата „уметност“ … и (кич)култура на оваа држава во втората деценија на 21от век!
Речиси по истоветен шаблон, на почетокот никој не сака да верува. Потоа е веќе (пре)доцна.
5.
Шок фазата, фазата на одбивање да се поверува, сепак не трае (пре)долго. Односно, соочувањето со можниот развој на нештата и потенцијалните консеквенци, со таа и таква наметната реалност, иницира брзо „групирање“ на слободни неистомисленици контра матрицата т.е. либерално настроени професионални, стручни, протестни групи, но и индивидуални истапи. Но и оваа фаза на консолидација и групирање на силите е проследена (се’ уште) со голема доза на неверување во очигледните симптоми за тоа што (ќе) се случува, во негирање на отворените назнаки, па дури и дрски најави на „новиот поредок“ во стварноста, во уметноста.
Делумното и по правило расцепкано и неорганизирано спротивставување на надоаѓачката естетска катастрофа кај нас беше видливо во првиот студентски протест против изградбата на црква на Плоштадот. На студентската „Архи бригада“ (во која што „членуваа“ главно студенти по архитектура, но тотално игнорирани од нивните професори) им беше спротивставена далеку поголема и поорганизирана толпа „верници“ со црковни и литиски знамиња и икони, но и со видливи ударни групи, заштитени дури и од полициските сили. Овој тип на „граѓанско“ контра „опозициското“ спротивставување понатаму ќе стане заштитен знак на оваа идеолошка матрица. Таков ќе биде и „протестот“ на културните работници против парламентарната опозицијата, каде што со виолини и таламбаси лумпен културата ќе „протестира“ зашто опозицијата го кочела буџетот!
Оваа пак фаза, од аспект на идеопоклониците, е време на полн напон, време кога малоумните маршираат, а лековерните им се придружуваат. Во тоа време идеолошката хистерија е на врвот, се сечат црвени ленти пред т.н. споменици, се поставуваат камен темелници на идните филмски кулиси. Паралелно, започнува и процесот на инфилтрација на лумпен интелигенцијата задолжена (читај: платена) за пропаганда и величање на „новото“. И тоа се случува во сите пори на општествениот живот, и преку разни начини на инсталација. А на рака им одат цела низа погодности: збунетост на поголемиот дел од интелигенцијата, нивна колебливост, заплашеност и итн. Една од погодностите е токму комбинацијата на сите овие фактори, демонстрирана низ неделувањето и молчењето како омилена форма на „протест“ на македонската интелектуална елита. Тоа беше формата избрана и од професорите на Архитектонскиот факултет (со чесни исклучоци!) кои не само што не ги поддржаа своите студенти, туку дел од нив се трансформираа во апологети на новата „архитектура на кулиси“ во Македонија. И, како и секаде, така и кај нас, оваа „групација“ на молчаливци се покажа(ла) најбројна. Што, всушност, е и историски докажливо.
Но, од друга страна, многу позначајни за идеолошката пропаганда е диференцирањето на елитните одреди, оние ударни тупаници составени од квазиинтелектуалци, распоредени низ сите пори на јавниот / општествениот живот, со основна задача да ја величаат новата (кич)култура и квазиуметност. И таквите македонски зиглерчиња, визелчиња, семионовчиња, гебелсчиња, ждановчиња, рифеншталчиња … ќе го окупираат целиот јавен простор, сите културни институции и нивните програми.
Одговорите на ваквата идеолошка кич окупација на стварноста – поединечни, разногласни, раштркани – не можеле / не можат да бидат соодветен пандан на поплавата на невкусот. Но, можеле / можат да иницираат расправи и полемики, да вршат естетски упади во владеачката кич пропаганда, професионално и стручно да ги аргументираат небулозите на новата матрица, да ги демаскираат квазиинтелектуалните срања на ударната идеолошка група. Тоа е некогашното време на полемиките Лазески / Протуѓер контра Киро Хаџи Василев, сегашното време на одделни индивидуални пројави преку неколку Интернет портали, социјалните мрежи (особено Facebook), еден-два печатени весници … користењето на многуте ставови и мислења на странски стручњаци кои целосно ги дерогираат локалните „идеолози“ итн.
6.
Третата можна фаза на отпорот против идеолошките дикатати во уметноста би била фазата на конфронтација, односно отворен судир на мислења, ставови но и акции контра културниот / уметничкиот естеблишмент. Зашто, од една страна, притисоците на естаблишментот и нивните трабанти јакне до врвната точка (понатаму, по сила на законитостите, започнува да опаѓа!), сите финансиски средства се делат исклучиво по идеолошко партиска линија, секоја критика се доживува како предавство, антидржавен бунт. Оттука, од друга страна, творечката опозиција сигурно доаѓа до сознанија дека годините на шок и консолидација, годините на „илегала“ и молчење не носат резултати, дека царството на кичот не се дезавуира исклучиво со зборови. Особено младата творечка опозиција по правило е носител на порадикалните ставови и идеи за надминување на состојбите, прибегнувајќи кон алтернативни модели на акција и присуство во јавноста.
Во некогашна Македонија тоа беа групите „Денес“ и „Мугри“, во рамките на некогашна Југославија тоа беа „Задарската група“, „Групата на Единаесетмината“ и слично, во некогашниот СССР тоа беше „Одеса групата“ итн. Тоа беа примери на алтернативен творечки одговор на репресивните состојби во културата и уметноста, тогаш.
Денес можностите се поголеми, репертоарот е побогат. Не само заради технолошката револуција и новите (сеприсутни) медиуми, туку и заради посилната самосвест на денешниот уметник. Едновремено, светот е дефинитвно „смален“, информацијата е на еден клик, а и изворите на средства стануваат подостапни. Македонскиот (не само) млад самосвесен уметник денес едноставно не трпи умислени „underground“ величини на кои Хорхе им доаѓа на изложба, зашти тие се денес македонскиот underground. Македонскиот (не само) млад самосвесен уметник денес ги презира идеологизираните културни институции и „гради“ свои: монтажна галерија, Serious Interests Agency, открива други алтернативни простори, се здружува во „Кооперација“ итн. Идеологијата, која е да е’ и каква и да е’, нема одговор на тоа. Зашто адекватен одговор не се и не можат да бидат минхаузенот Станковски алијас Сарајлија, „енциклопедистон“ Величковски алијас „автор на филмови“, лекоумнион Симјановски алијас „режисер и публицист“ … тоа не може да биде ни оној распојасан во лажноно злато Славенски, чија секоја ментална мастурбација се плаќа огромни пари … уште помалку тоа можат да бидат сите оние „автори“ на налудничавине „креации“ и креатури низ центарон на Скопје.
Ние можеби не сме имале македонски „Булдожер“ (позната изложба на независни уметници близу Москва во 1974 година, растурена со водени топови и булдожери), ама македонската култура, по којзнае кој пат, го виде својот дел од пеколот. Ги виде на дело и сите инквизициски методи на справување со неистомислениците, го виде монтирањето на полуписмена бирократија, ја виде инсталацијата на туткуни и шутраци на врвните места во културата и уметноста, го виде своето „културно чистење“ … Но виде и дел од можните творечки одговори, особено оние од помладата генерација македонски уметници. И без оглед како и колку тие денес се чинат изолирани и неприфатени од етаблираната (квази)уметност и (не)култура, нивното време допрва доаѓа!